Hoxe reunínomos, en Castrelo, os axentes de pastoral que nos vimos formando na Escola
de Catequistas dende hai algunhas décadas, acompañados por algúns sacerdotes que
apoian e acompañan esta realidade en Arousa, que despois do Sínodo diocesano, se
adheriu á EDAP.
O tema da xornada foi a sinodalidade, e o encargado de conducila formación e posterior
diálogo foi o noso bispo auxiliar, don Francisco José, ao que lle agradecemos a súa visita e
dispoñibilidade para compartir con nós esta mañá.
Despois de poñernos á escoita do Espírito, rezando xuntos, lembrando o noso Bautismo e
agradecendo os dons recibidos de Deus, pasamos ao momento de traballar: escoitando
tódalas ideas que don Francisco nos presentou e compartindo en grupo as dúbidas,
inquedanzas e esperanzas, que o tema da sinodalidade nos suscitou.
O Sínodo non nos é alleo: todos nos sentimos partícipes da Igrexa, a todos nos ocupa e
preocupa a misión que nos compete atendendo á diversidade que debe existir dentro da
unidade. A Igrexa é o noso fogar e escola de comuñón, como nos dixo don Francisco,
lembrando ao papa Xoan Paulo II. Habemos de manternos á escoita, atentos ao que Deus
quere para cada un de nós na Igrexa, para que, deste xeito, todos poidamos contribuír á
construcción dunha Igrexa máis sinodal, unha Igrexa na que o pobo de Deus camiñe
xuntos, aínda que cada un vaia ao seu ritmo.
Sempre que nos reunimos fóra das nosas parroquias o encontro enriquece a nosa vida de
fe e énchenos de ánimo para continuar sementando ou tirando as redes ao mar; don
Francisco animounos a que sigamos a ser sementadores, preocupándonos menos polos
froitos, aínda que, ás veces, a nosa natureza humana nos leve polo camiño da inmediatez.
Cos ánimos e o compartir xuntos, fraternalmente, quedamos para o vindeiro 19 de febreiro.
Fátima Noya
