Como por toda a xeografía diocesana, tamén no cárcere de Teixeiro estamos a celebrar a Pascua do Señor. O pasado Domingo tivemos a celebración da Santa Misa, coa bendición duns ramiños de Oliveira, pequeno signo visible do Deus que nos trae a paz, nos bendí e se fai presente entre nós, e especialmente entre os máis pobres e esquencidos.
O salón multiusos do Centro Penitenciario estes días é templo no que se derrama a graza, e no que se nos lembra que non hai lugar do mundo invisible ós ollos de Deus, e alleo á esperanza da Cruz, convertida en supremo signo de Amor.
Hoxe, Xoves Santo, o Bispo de Mondoñedo-Ferrol, Mons. Fernando García Cadiñanos, presidiu a Misa da Cea do Señor, acompañado do voluntariado e visitantes próximos á Pastoral Penitenciaria, que foron convidados a pasar o Triduo Pascual nun lugar tan especial. A celebración, tan rica en si mesma de simbolismo, foi especialmente emotiva. O lavatorio dos pés foi un momento especialmente significativo, sinalando o compromiso de servizo que o Señor desexa para a súa Igrexa.
Así o lembrou D. Fernando na homilía, que tocou tres puntos fundamentais da mensaxe do día de hoxe: Xesús, antes de morrer, quixo dar un testemuño de servizo, e ensinarllelo así ós seus discípulos, lavándolles os pés; a resistencia de Pedro a ser lavado é espello da nosa dificultade para deixarnos axudar, e sen embargo debemos recibir o don de Deus e dos irmáns para encontrar o sentido da nosa existencia; tamén fixo referencia na homilía a que Xesús foi preso e xulgado, e pode comprender ós que padecen prisión, que non deben desconfiar de ser escoitados por Deus, amosando que este tempo de pesadume é tamén tempo de salvación.
Mañá será o Sr. Arcebispo D. Francisco José Prieto, o que virá acompañar ós reclusos na celebración do Vía Crucis. O Domingo de Resurrección esperamos contar coa visita de Mons. Julián Barrio, bó amigo dos presos, quen tódolos anos se fixo presente en Teixeiro, e este ano presidirá a Misa de Pascua.
J.G.R.
