Este venres 25 de abril, ás 17:00 horas, terá lugar no Salón de Actos do Colexio de San Paio a presentación da obra colectiva Desde San Paio de Antealtares. Historia, patrimonio e vida monástica, un libro que rende homenaxe á arquiveira sor Mercedes Buján polo seu compromiso coa conservación e estudo do patrimonio monástico galego.
Coordinado polos historiadores Miguel García-Fernández e Ricardo Pichel, o volume afonda na historia e legado do Mosteiro de San Paio de Antealtares, unha das institucións máis emblemáticas do ámbito relixioso e cultural de Santiago de Compostela. A obra conta coa colaboración de numerosos expertos que achegan diferentes perspectivas sobre a vida monástica, o arquivo e a riqueza patrimonial deste enclave.
A publicación foi coeditada polo Consorcio de Santiago e Alvarellos Editora, nun esforzo conxunto por poñer en valor o labor de sor Mercedes Buján e a importancia do arquivo do mosteiro como fonte de investigación histórica.
A presentación contará coa presenza dos coordinadores da obra, así como de representantes das entidades organizadoras e colaboradoras, nun acto aberto ao público interesado na historia, o patrimonio e a vida monástica de Galicia.
